बदल

*बदल......*


नाही कसं म्हणु मी
झालायच म्हणा बदल
आदर्शांना धरुन चालणारी
आता दिसत नाहीत दल ।।

बळ वाढायचं पुर्वी
कुणी म्हटलं की दल
हरवलय ते बळ सारं
आता दल म्हणजे फक्त दलदल ।।

ह्याच दलदलीत
रुतुन बसतात कित्येकांचे पाय
सारं बळ लावुनही
मग निघता निघत नाय ।।

पायाला हल्ली तशी
कमी बोचतात काटे
क्राँक्रीटच्या जंगलात
पसरतील कशी बोरी, बाभळीचे फाटे ।।

कातडी राहतायत सुरक्षित
पण काळजात आहेच की सल
मग कसं म्हणता येईल
झालाच नाही बदल ।।

सकाळी हिवाळा, दुपारी उन्हाळा
अन् रातच्याला पडतो पाऊस
क्षणातच हल्ली इथे
ऋतु बदलतायत कुस ।।

माणसांचे संदर्भ अन् मातीचा गर्भ
बदलता येत नाही असं वाटायच पुर्वी
पण आता सारंच बदलुन टाकालय आम्ही
खरय जगण्याचा बदलला कल
की जगात अनिवार्यच ठरतो बदल....।।

*🖊शशि....( बदल बघताना )*
www.shashichyamanatale.blogspot.com