भारतदेशा

हे भारत देशा
इथल्या कित्येक कानांवर
तुझ्या जयघोषाचे गाण पडत नाही
असं नाही
पण रिकाम्या पोटाला त्यांच्या
त्या गाण्याच्या अर्थाचा
प्रश्नच पडत नाही.....

तु सुजलाम सुफलाम व्हावं
असं त्यांना वाटत नाही
असंही नाही
पण टिचभर पोटात
भुकेच्या मेघांशिवाय काहीच दाटत नाही.....

तुझ्या अंगाखांद्यावर खेळणार्या नद्या
त्यांच्या पायथ्याशी माञ ओसाड असतात
पुर्वेला वाहुन नेणार्या पाऊस धारा
त्यांच्या माञ पापण्याआड दिसतात....

म्हणुन हे देशा ,
जोपर्यंत त्यांच्या भाकरीचा
प्रश्न सुटत नाही
त्यांचही नातं तुझ्याशी
पाहिजे तसं जुटत नाही....

तेंव्हा जोपर्यंत तुला
त्यांच्या भुकेचं गीत कळणार नाही
त्यांनाही तुझं गीत
वळणार नाही

म्हणून फार काही वाईट
वाटुन घेऊ नको
उगाच आहे नाही तेवढं
रगत आटुन घेऊ नको ....

*🖊शशि...( दुर्लक्षित भारतीय मांडताना.....)*

*देशभक्तीच्या गप्पा पोटावरुन हात फिरवताना सुचतात... पोटात काही नसताना नाही....*
*हे कितीही नाही म्हटलं तरी वास्तव आहे...*
*म्हणुन उगाच देशभक्ती भुकेपेक्षा श्रेष्ठ असते असा युक्तीवाद लढवण्याचा प्रयत्न न केलेलाच बरा.... काय..?*