माझाबाप

***** *माझा बाप* *****

बापान कधी परदेश वार्या केल्यात नाईत ना कधी पंढरीच्या वार्या
पांढरीच्या मातीतच तो राबत आलाय आजवर
काळ्याशार मातीची पांढरीच त्याची पंढरी
अन् तिथला तो वारकरी .....

बैलाचा कासरा रुम्हण्याला गुतवुन जवा उभा राहता तो
तवा पाहुन त्याचा तो रंग
तोच वाटु लागतो मला पांडुरंग ...

बापाला कधी सातासमुद्रापार जाता नाही आलं
पण बापाच्या डोळ्यातला समुद्र पाहिला की वाटतं
एकदा घेऊन यावं त्या समुद्रांना इकडं अन् सांगावं
अरे बघा, तुमच्यापेक्षा विशाल तर माझ्या बापाचे डोळे आहेत ........

या त्यात तुम्हीही सामावुन जाल
त्यांच्यात नकळत मग एकरुप व्हाल
तुमच्यापेक्षाही खारट त्याची आसवे
जी जगाला नेहमीच वाटतात फसवे

बाप काही फाॅरेन रिटर्न नाही
ना ही फारच काही शिकलेला
पण आयुष्याला टर्न कसा द्यायचा ते माञ तो चांगलाच शिकलेला .......

म्हणुनच तर जगभर फिरणार्या बापांपेक्षा
जग फिरायला शिकवणारा
अन् वेळ आल्यावर फिरवायला शिकवणारा
माझा बापच मला श्रेष्ठ वाटतो ...........

*✍शशिकांत मा. बाबर*
*📞९१३०६२०८३४*
*www.shashichyamanatale.blogspot.com*